Boebelste Kantenkacheln vun ein Aben

• Klei, gräun glasiert
• üm 1600
• so bi 14 x 22 cm
• utleihnt vun dat Lannesamt för Kultur- un Denkmalplääg Mäkelborg-Vörpommern

De gräun glasierten, binah halwrunnen Platten wiesen de Siedenansicht vun ein Mann un vun ‘ne Fru. Sei sünd as Medaillon makt un inrahmt vun Blaumenzierraten, de an’t Enn in so’n Muster tausamenloopen, wat utsüht as ‘n Schnickenkringel. Rechtsch un linksch vun dat Medaillon drägen so’ne Oort Delfins Blädderranken. Up dat Manns- un Frugensbild stahn kein Namen nich up. So blieben sei allgemein. So as de Kacheln utseihn, moeten dat boebelste Kantenkacheln sien. Dat wier woll so, dat de Mann un de Fru sick ankeeken.

Kachelabens wieren nich blot dörfor dor, dat de Lüüd dat warm harden, nee, de Kacheln un de heile Aben wieren ok Schmuck un vull mit Biller. So is tau seihn, dat väle Biller wiesen, dat de Lüüd klauk warden wullen un dorvun giwwt dat väle Billerprogrammen, de dat wiesen. Disse beiden Billerkacheln sünd in Pasewalk in Brandschutt vune in Huus, dat 1630 kaputt güng, in de Neehg vun de Marienkirch funnen wuurn. Sei wiesen de Kultur vun de Sake nun dat Wahnen in dat late Middelöller un de tiedige Niegtied. Sei gäben ok Utkunft, woans de Lüüd läwt hebben un oewer de Kunst- un Religionsgeschicht, oewer Hannels- un Wirtschaftsgeschicht tau de Tied.

1630 föll de Stadt Pasewalk in den Dörtigjöhrigen Krieg in Schutt un Asch dörch de Truppen vun den Kaiser. Dorüm finnen Archäologen hüüt noch ofteins wat dorvun, wenn in de Midd vun de Stadt buugt ward. Väle Fundstücken vun Kacheln ut dat 16. un tiedige 17. Johrhunnert sünd so funnen wuurn un wiesen so, wo riek de Lüüd dunn west sünd. Dat wat funnen is, ward mit anner funnen Saken ut de Gägend orrer ok vun wieder wech vergläken. Oewerresten vun de glieken Serie vun boebelst‘ Kachelkanten sünd in Stralsund nich wiet vun de Nikolaikirch funnen wuurn.