Bruutkronen

• Wull, Sied, utstickt
• üm 1900
• 10 bet 20 cm hoch

De Bruut ward, as oewerall in Europa un in de Welt, bannig upfidummt. De Hochtiedskleeder, meist mit ‘n Koppputz dortau, ünerscheiden sick vun de Kledaschen, de de Lüüd olldags anhebben. De Koppschmuck is in de Midd vun Europa meist ‘ne Bruutkron. Ut de Gägend vun dat Fürstentum Ratzborg sünd binah 20 vun disse Kronen erhollen. Ein Gestell vun Draht is mit Dauk ümwickelt. De Formen sünd sick ähnlich. De lütten Zylinders, de 10-20 cm hoch sünd, wüürn siehr fiegeliensch schmückt mit sülwern Fadens, de Bäwernadeln, mit lütte Glasparlen, mit bunte Dauk- orrer Papierblaumen orrer Feddern.

För de Dierns is dat ‘ne hohge Iehr bi de Hochtied ‘ne Kron tau drägen. Dat wier ‘ne Schand, wenn de Bruut kein Kron kreeg, sünnern blot ‘n Kranz, wiel sei all „beschlapen wier“, dat heit, vör de Hochtied all mit‘n Mann tausamen wier, orrer wenn ‘ne Wittfru wedder heirat‘ hett. För dissen Bruuk gifft dat ok verschiedene Bedüdung. De Bruutdracht in Schönbarg orrer Rehna is schmuck un bunt, de Bänner vun de Kron gahn bet tau den Suum vun‘n Rock. De Bruutkronen wiesen ok de besünner Pracht.