Christkind mit‘ne Flitterkron‘

• Holt, bunt infatt‘
• Brabant
• üm 1500
• ohn de Kron (de mät 7 cm) 32 cm

Disse Figur vun ein Christkind, dat Kleeder anhett un ‘ne Flitterkron up sienen Kopp is besünners kostbor. In de Tied nah de Reformatschion is diss Figur in ein Reliquienschapp ‘rinbuugt worn. Up dat Kleed vun dat Kind is ‘n Zeddel, de wiest dorup hen, dat vördem mal ein Span vun dat hillig‘ Krüüz in diss Schapp verwohrt wier. Disse Figur vun ein nackichtet Christkind, dat steiht, schmüstergrient un Segen bringt is üm 1500 in Serien in Brabant un Mechelen schnitzt un bunt infatt‘ worn.

Disse Figuren wüürn vor allem för Fruugensklöster för de Andacht un tau‘n Antrecken makt.Väle anner Christkindfiguren ut evangelisch‘ Damenstifts drägen woll noch ehre Kleeder ut dat Middelöller, oewer so‘ne Flitterkron‘ gifft dat nich miehr so väl.
Nahdem dat evangelisch‘ Damenstift „Kloster tau‘n hilligen Krüüz“ in Rostock schloten wier (1920) kamen de lütten Biller un Figuren, de sei ut de Tied vun de Zisterzienserinnen uphäägt hebben, in dat Mäkelborgsch‘ Lannesmuseum. Dat sünd bannig väle un so väle verschieden Stücken, dat dat sowat in Düütschland nich noch eins gifft: Statuetten, lütte Altäre, Reliquiare un ok süss noch Andenken.