Ernst Barlach: Mudder Ierd II

• Ernst Barlach (1870-1938)
• Mudder Ierd II
• 1920
• Gips ünner Schellack
• 72,5 cm hoch

In de Johren 1906 bet 1908 befat‘ sick Barlach in siene Berliner Johren stark un strevig dormit, woans ein up moderne Oort un Wies Gräwer gestalten künn. Hei nimmt mit väle Vörsläg an männig Wettstriets deil. Vun de Familie Dr. Richard Biesel ut Stettin kriggt hei ‘n dägten Updrag för ein Grawwmahl. Hei makt dat nah moderne Ideen vun Gestaltung. De Mudder Ierd II wiest ‘ne Fruugensgestalt, de ehren Schoot as Born vun dat Läben wiest un tau glieke Tied dorup henwiest, dat de Doden in dissen Schoot, in de Ierd, trüchkiehren.

Den grote Mythos vun de Ierd as Mudder vun de Minschenskinner grippt Barlach up un gifft em mit disse Figur ‘n Afbild för ewige Tieden. De Entwurf vun Barlach ward ut Muschelkalk makt un 1921 up den Stettin‘schen Zentralfriedhoff upstellt. De Grawwfigur steiht up einen sachten Knüll mank Läbensbööm. Dorvör is ‘ne lütte Grawwplatt mit ‘ne Inschrift inleggt. Lange Tied, nahdem de Familie Biesel dat Graww upgäben hett, schenkt Polen de Muschelkalkfigur 1964 nah Güstrow. Dor steiht sei hüüt up den Gertrudenfriedhoff. 2011 wier de 90. Johresdach dorvun, dat de Figur dat ierste Mal upstellt wüür. Dorüm hett de polnisch‘ Bildhaugerin Monika Szpener in November 2011 ‘ne Kopie ut Steinguss makt, de up den Zentralfriedhoff in Stettin upstellt wüür.