Kopmannsladen Ebmeyers

• Holt, Blick
• 1920er Johren
• 5,20 m lang
• 4,10 m breit
• 2,70 m hoch

De Inkopsstrat von Boizenburg is de Buustrat. Disse Strat is nömt na ehre Bewahners: Ackerbörgers, de Landbuu dräben hebben. Üm de Wenn tau dat 20. Johrhunnert hett sik dat ännert: De Strat kricht’n Upschwung dörch 30 Gewarf- un Handwarksladens, so ok in Hus Nummer 18 „Ebmeyers“ Laden. Tauierst hett hier de Fischhöker Hugo Stöckmann verköfft, von 1925 an de Kopmann W. Frielitz, de ut Hamburg-Altona stammen ded. Hei verköfft Läbensmittel un allens, wat’n so dachdäächlich bruukt. Von 1935 an œwernimmt Karl Ebmeyer ut Brahlstorf denn Laden. Siene Familie verköfft in denn lütten Laden miehr as 70 Johren lang. De Ladeninrichtung ut de 1920er Johren is binah ganz un gor erhollen.

Karl siene Dochter Ruth Ebmeyer hett denn Laden ok tau DDR-Tieden as privaten Laden führt. Sei wier œwer ok de letzt’ Ladenbesittersch. Sei hett einen Kommischionsverdrach, de ehr Provischionen tausecht un ok de Stüern beten wat afminnert, œwer sei blifft na Recht un Gesetz sülfststännig. De Pries för Woren is œwer fastlecht.

Dat, wat de Minsch notwennig tau’n Läben bruukt, ward in de DDR bannig ünnerstütt’ un de Pries is lütt. All Woren kosten œwerall denn sülwen Pries (EVP): ’ne Semmel kost 5 Pennings, de 5 Kilo-Büdel Kartüffeln 85 Pennings. Wat de Lüd ok gaud kennen, is, dat Woren knapp sünd, so as Appelsinen un Bananen orrer ok "Grabower Küsschen". Dor is dat mit so’n "Tanten-Emma-Laden" in de Nawerschaft gor nich so leech: de ein’ kennt denn annern un ein Hand wascht de anner – so gifft dat männigmal ok "Bückworen", dat heit wat "ünner denn Ladendisch". As Ruth Ebmeyer 2006 up Rent’ geiht, makt sei denn Laden tau. Ein Deil von de Utstattung ward in dat Museum wiest.