Lubinsche Kort vun Pommern

• teikent vun Eilhard Lubin (1565 – 1621) in Rostock
• staken vun Nikolaus Geilkercken (1583/8 – 1675) in Amsterdam
• in Kopper staken, 12 Blädder, 1610 – 1618
• 2. Uplag vun 1758
• Maßstab so bi 1 : 235.000
• 221 cm breit

"Nova illustrissimi principatus Pomeraniae descriptio cum adjuncta Principum Genealogia et Principum veris et potiorum Urbium imaginibus et Nobilium Insignibus". De latiensche Nam künn so oewerdragen warden: Niege Beschriewung vun dat Herzogtum Pommern, Stammboom vun de Herzög un ehre Biller, ganz nah ehr Natur teikent un ok noch de Biller vun de wichtigen Städte un de Wapen vun de Eddellüd – allens mit dorbi.

De "Grote Lubinsche Kort" is ‘n groten Hopp nah vörn bi dat Landkortenmaken vun Pommern. De Herzog Philipp II. vun Pommern-Stettin gift dissent Updrag an den Perfesser Eilhard Lubin ut Rostock.

Disse Landkort is de ierst vun Pommern, de nah Vermätung un Beräknungen makt is. Up disse Oort is sei dat ierste Afbild as Landkort vun Pommern, dat dicht nah de Würklichkeit rankümmt.

Up de so nömte “Landtafel” is allens sammelt, wat‘n tau de Tied oewer dat Land wüsst hett: de Wapen vun 353 Eddelfamilien, Biller vun 49 Städte, Stammbööm vun de Herrschaften un ok noch‘n langen Lex, de dat Land beschrieben deit. Dorbi is ok noch ‘ne List vun 79 Oorten Fisch.