Modell vun dat Damp-Schipp ERBGROSSHERZOG FRIEDRICH FRANZ

• iesern Schruubendampschipp mit Schonertakelasch
• Maßstab: 1:50
• 120 cm lang

De ERBGROSSHERZOG FRIEDRICH FRANZ is dat ierste Schipp (Buugnummer 1) ut de niegbuugte Schippswarft un Maschinenfabrik vun Zeltz un Tischbein in Rostock un sei is technologisch wat bannig Nieges: Dat Schipp wier de ierst‘ seegängig iesern Schruubendamper vun Düütschland, hett oewer noch de Schonertakelasch. De Jumpfernfohrt geiht nah London. 1853 nimmt dat Schipp den Linienverkehr vun Rostock nah Sankt Petersburg ierst nah ‘ne Wiel up, denn dor baben güng dat Ies.
Dat Schipp wier’n Erfolg un jedein wier taufräden. Ok de tweite Fohrt geiht mit Weiten un Saatkuurn nah London hen. Ierst in’n Mai ist de Newa frie vun Iesgang un denn geiht die ierste Tour nah Sankt Petersburg.

Oewer de Schippers vun dit Schipp un ok vun dat Schwesternschipp GROSSFÜRST CONSTANTIN (1) hebben kein Gewinn makt. Mit dat, wat rinkümmt, sünd sei nich taufräden. In Mai 1852 mallöört dat un de ERBGROSSHERZOG FRIEDRICH FRANZ un ein norwegisch Schipp scheiten tauhoop. In Juni strandet sei vör Gotland. 1853 ward dat so ümbuugt, dat sei 4 Passaschieren miehr mitnähmen koenen. Vun Juni 1854 an ümschippern sei de Afschottung för de britisch-französ’sche Flotte in de östlichen Ostsee. Beide Schäpen warden 1855 an ‘ne holländ’sche Reederei verköfft. In Dezember 1857 strandet de GROSSFÜRST CONSTANTIN bi Lemvig/ Westjütland. Dorbi geiht dat Schipp in’n Dutt un de Ladung verluuren.