Modell vun de Festung Dömitz
Mihr Billers
- Modellbuuger Klaus Beyer
- Rostock
- 2011
- Dat Modell is so as dat Original up ein fiefekig Platt anleggt
- Maatstab 1:500
- Dörchmäter: 70 cm
De Festungsanlag Dömitz liggt an de Elw un is ein vun de poor nahbläben Flachlandfestungen ut dat 16. Johrhunnert in Nuurddüütschland. Anleggt is sei as Fiefeck mit Bastionen un Kasemattengewölw. So is sei ‘n Bispill för de dulle Afwehrarchitektur in de Renaissance-Tied. Weil de Festung so besünners buugt un sei so gaud erhollen is, steiht sei siet 1975 ünner Denkmalschutz. Siet 1953 is dor ‘n Museum oewer de Gägend un de Stadt Dömitz in.
De schönst‘ Ruum vun de Festung, de ollig Indruck up de Besäukers maken deiht, is de „Pulverkeller“. Dot kann’n sick allens bekieken oewer de 750-jöhrig‘ Geschicht vun de Festung Dömitz. In den Torm vun de Festung is de Gedenkhall för den Meckelbörger Schriewersmann Fritz Reuter. Dor gifft dat väl tau bekieken un tau läsen oewer sien Läben un dat, wat hei schräben hett. Up de Bastionen un in de Kasematten kann’n sick oewer de Anlag‘ un dat Afwehrsystem vun disse Festung klauk maken.
Text: J. S.
