Philipp Otto Runge: ut Kopper schnäden Bild "Abend, Dag un Nacht"

• 1803
• Höhe: 71,9 cm

In den Oktober 1999 hett ein Nahfohr vun Phillipp Otto Runge drei vun vie rut Kopper schnäden Biller, de hei harr, Wolgast un de Museen vun Wolgast schenkt. Dat sünd Biller ut ein tausamenhangend Wark oewer de Tied. De Biller sünd so de iersten originalen Biller vun Runge, de ein berühmten Soehn vun siene Vadderstadt Wolgast is, wedder tauhuus kamen.

In de Nähg vun den Haben is Philipp Otto Runge an den 23. Juli 1777 buuren. Hier hett hei as Kind läft. Denn hett hei in Kopenhagen un Dresden dat Malen un Teiknen studiert un hett den bet tau sienen tau tiedigen Dot 1810 in Hamborg läft. Hei harr ‘ne Fru, de Pauline heet, un vier Kinner. Dorvun kümmt dat, dat hei väle Nahfohren hett.

Sien tausamenhangend Wark vun in Kopper schnäden Biller oewer de Tied “De Tieden” gellt as Anfang vun de Romantik in de Kunst in Düütschland. Disse Grafiken sünd ein Sinnbild oewer dat Thema: wat warden, wassen un denn wedder vergahn, wat ‘n Kreisloop vörstellt, de ümmer wedder von vörn anfangen deit. So is dat in‘t Läben, in de Natur un ok in dat minschlich‘ Läben. Runge hett dorbi versöcht, dor achter tau kamne, woans dat mit dat Licht is. Hei hett as Ierster in de düütsche Kunstgeschicht ‘ne Farwenkunn‘ utgrüwelt, de de Farwen in drei Dimensionen dorstellen deit. De Grafiken hier wieren eigentlich as bunten Schmuck för de Wand dacht west.

Hei will in disse Biller den Anfang un dat Enn vun de göttlich‘ Warke, vun dat Läben un de Leiw wiesen. Dormit hett hei sik nich miehr an de Antike ‘n Ogenspeigel nahmen, wat tau de Tied de annern makt hebben, sünnern ‘n nieget Thema anfungen. Man blot dat Bild vun den Morgen kunn hei noch mit Farwen malen, dunn bleef hei väl tau tiedig dot.

De Wolgaster originalen Biller hüüren tau den iersten Druck, den dat vun Runge siene “Tieden” geef.