Schloetel mit dat Firmenlogo vun de Warnow-Warft

• 1949
• 65 cm lang

Dor, wo vör den Krieg de Kröger-Warft in Rostock-Warnmünn un de demontierten ARADO- Fleigerwarken wieren, fangt nah den Tweiten Weltkrieg de „Bootswarft Warnmünn“ wedder mit Bootsbuug an. Tau’n Anfang warden lütte Schäpen heil makt. 1946 fangen sei an, 17-Meter-Fischkutter tau buugen. Vun den 1. August 1948 an nömen sei de Warft „VEB Warnowwerft Warnemünde“. De Schloetel ward an den 1. Mai 1949 vun de Buugarbeiters an de Boebelsten vun de Warft oewergäben, as de Produktschionshall „Hall Nummer 1“ fardig is.

För ‘ne korte Tied wier de Bootswarft Warnmünn de Schippsreparaturwarft Wismar tauschlahn. Oewer 1947 gifft de SMAD ‘n niegen Befähl un denn ward sei wedder sülwststännig, wenn ok ünner dat Leit vun de „Vereinigung Volgseigener Werften“ (VVW). De Lüüd, de dor arbeiten, kamen meist ut de Krögerwarft un ut de tweiig un demontierten Fleigerwarken. Vun 1947 an kamen dortau väle niege Arbeitslüüd ut de Oderwarken in Stettin un Ümsiedlers. De SMAD-Befähl Nr. 112 vun den 23. Juni 1948 rägelt, dat de Warft wedder vun de Reparaturwarft Wismar aftrennt ward un sülwststännig ünner dat Leit vun de VVW arbeiten deit.

1949 arbeiten up de Warft all 3.436 Lüüd, 1954 sünd dat denn sogor all 9.634. Dat, wat de up de Warft buugen, is binah allens eigens för de Reparatschion för de Sowjetunion, so as dat Potsdamer Abkommen dat 1945 vörseihn hett. För all den Schaden, de de Sowjetunion in den Tweiten Weltkrieg harr, gifft dat den Utgliek vör allem in ‘ne materielle Form. Nah de ierste Tied, all in Februar 1945, hebben de Alliierten an den 14. Januar 1946 dat „Pariser Reparatschionsabkommen“ uthannelt. För jedein Staat is dorin fastleggt, wat för Ansprüch sei stellen. Dat, wat de Sowjetunion hebben will, sall ok ut de Sowjetischen Zone kamen. Tauierst hebben sei de Industriebetriebe afbuugt un mit de Iesenbahn in de Sowjetunion schickt. Miehrstendeils hebben sei dor de Anlagen un allens oewer gornich wedder in Gang bröcht. Vun de Mitt‘ 1946 an hebben sei denn de groten Betriebe tau sowjetisch Eigentum makt orrer sei wüüren as Sowjetisch‘ Aktiengesellschaften wedder frisch grünnt. Disse Betriebe arbeiten allen vöran för de Reparatschion. Nah den Volksupstand vun den 17. Juni 1953 oewergifft de Sowjetunion disse Betriebe an de DDR.