Schlott Güstrow – Festsaal

• 1570/1620

De staatsche Saal vun de Residenz wier tau de miehrste Tied för de Fieern bi Hoff dacht. De Rotwildfries vun Christoph Parr, den hei üm 1570 makt hett, is ut bunt infat‘ten Stuck. Dormit hett Ulrich ‘ne herrschaftlich‘ Form vun Dekoratschion begrünn‘t, de sick vun Güstrow ut oewer den Ostseeruum bet nah den Süden vun Düütschland utbreit‘. De Diere sünd so malt, as sei sick ok in de Diergordens vun de Eddellüüd orrer in de Natur hebben: sei springen ‘rüm, fräten un sünd tausamen tau seihn. De Hirsche un de Hirschkäuh gellen as Sinnbiller för fürstlich Ehelüüd. Up disse Oort nimmt de Fries dat Motiv vun de Kartuschen up, de doroewer anbröcht sünd. Sei sünd ümmer poorwies dor an de Wand un jedein drägt den Namen vun de 16 hochadeligen Vörfohren vun den Herzog.

Disse genealogischen Bewies striekt siene Stellung in den Kring vun de Rieksfürsten ok noch rut.
De Nahfolger vun Ulrich, Johann Albrecht II. (1590-1636), lött denn dor noch ‘ne dulle, schmucksche Kassettendeck‘ intrecken, de de mäkelbörger Stukkateur Daniel Anckermann 1620 makt. De miehrsten Biller dorup gahn up ‘ne Reihg von Jagd- un Kampfszenen mit Diere trüch, de Johannes Stradanus (1523-1605) makt hett. Sei hebben sick as Kupferstiche ut de Warkstäd vun Philips Galles vun Antwerpen ut oewer Europa utbreit‘.