Schlott Wolgst, Parlen upstickt

• ierste Hälft vun dat 19. Johrhunnert
• 19,5 cm breit

1850 wüüren in Wolgst de letzten Oewerresten vun dat Residenzschlott afdragen. Siet de Tied truern de Lüüd üm ehr Schlott. In de Tied hett einer dit Bild mit Parlen utstickt. Dat wiest de Schlottruin un sitt in ein lütten, höltern Rahmen ut vier Sticken makt. De Parlenstickerie is up gräune Sied makt, mit Fadens fastmakt un upspannt. An’t Enn vun de Sticken sitten Druppens ut Elefantentähn.

In kakelbunte Oort un Wies, mit lürlürlütte Parlen makt, hett de, de dat stickt hett dat schafft, dat’n denkt, dat de Schlottruin wisswohrhaftig vör einen steiht.

Mit disse Oort Parlenstickerie hebben sick de Frugens väl un giern befat’t. So hebben sei mit väl Leif Saken makt, de’n jeden Dag in Gebruuk harr, so as Lüttkinnermützen, Schmuckbänner un ok Frugensgürtel.