Schultenhuurn

• Huurn vun Rindveih
• 19. Johrhunnert
• Länge: ca. 30 cm

De Schultenhüürn sünd de Alarmhüürn in‘t Dörp. De Ton is dump un erinnert ‘n bäten an‘n Näwelhuurn. De Hüürn, de hüüt noch erhollen sünd, sünd ut Kauhhüürn, de afsagt worn sünd. Sei sünd schmückt mit Ritzteiknungen un Datum. Sei sünd Teiken vun de Würd un dat Anseihn vun‘n Dörpschulten. Gäf sogor, dat dat Schultenhuurn an de Siet vun‘t Buernhuus, de vun de Strat tau seihn wier, anhangt wüür.

Schultenhüürn wiesen dat Anseihn vun ‘n Dörpschulten in dat 18. un 19. Johrhunnert. De Schult harr ümmer de Hufe I un sien Amt wüür verarwt. De Schult hett ok dat bekannt tau gäben, wat de Herzog tau mellen un tau bestimmen harr un ok, woans de Lüüd sick doran hollen. In‘n poor Dörper in dat Fürstentum Ratz‘borg hett de Schult ok Gericht hollen un möt den Gerichtsherrn Kost gäben. Dorför kriggt de Schult wat af dorvun, wat de Dörpfeldmark inbringen deit. Wenn de oll Schult dodblifft, möt de niege Schult, wat ok de Soehn sien kann, de den Hoff oewernimmt, den Schulteneid spräken. Hei möt vun nu an up dat Best för dat Dörp un den Lannesherrn sorgen.