Spälkorten

• Stralsunner Spälkortenfabrik A.G.
• Enn vun dat 19. Johrhunnert
• Papier, mit de Hand Kloer up bröcht
• Prüß’schet Duwwelbild, Düütsche Farwen, 28 Bladd
• 9 cm hoch

1765 kriggt Caspar Kern vun de Regierung de Konzessschion, dat hei Spälkorten maken dörf. Dorvun ward later ‘n Ünnernähmen, wat in de heile Welt verköfft. Dornah grünnen sick in Stralsund noch miehr Spälkortenfabriken. 1872 schluten sick de Produzenten von der Osten (Inhaber G. Mie), Ludwig Heidborn und Theodor Wegener (Inhaber: Fritz Wegener) tau ‘ne Aktiengesellschaft as Vereinigte Stralsunner Spälkorten-Fabriken Aktien-Gesellschaft Stralsund (VSS) tausamen. So tausamenschlaten hett de Firma miehr Geld un kann bäter konkurrieren.

1883 nimmt de Fabrik ‘n olligen Upschwung ünner de Leitung vun Karl Friedrich Heuser (1849–1919).

Hei makt dat Ünnernähmen grötter, giwwt Kortenbiller rut, de nah denn Schmack vun de Lüüd sünd un finnt ok niege Möglichkeiten, üm de Korten tau verköpen. Ok de Fabriken in Altenburg un Halle hüüren dortau un so warden 1907 miehr as de Hälft vun all Spälkorten in Düütschland vun de ASS rutgäben. 1931 gifft dat denn Entschluss vun de Hauptversammlung vun dat Ünnernähmen, dat de Produktschion vun Stralsund un Altenburg tausamenleggt ward as Vereinigte Altenburger un Stralsunner Spälkorten-Fabriken, A.G., Altenburg. In Stralsund is dat nich moeglich, wieder un grötter tau buugen un dörüm ward Altenburg, wat ok schön in de Mitt liggt, de Urt, wo de Firma sitt. Stralsund ward dunn upgäben.