Sünnendaschenklock

• Elefantentähn
• üm 1500
• 5,7 cm lang
• utleihnt vun dat Lannesamt för Kultur- un Denkmalplääg Mäkelborg-Vörpommern

Dat Stück vun de Sünnenklock is de Boddenplatt mit de Kompasskuhl un mit de Linien vun de horizontalen Sünnenklock. An de rechtsche boebelste Kant is’n Metallös orrer ok lütten Draht, dor, wo de Klockenbodden mit den Deckel tausamen keem. Kann angahn, dat de Binnensied vun den Deckel ‘n Ziffernbladd hatt hett. Dat weit’n vun anner Sünnenklocken vun disse Oort. Dat nömt’n Vertikalsünnenklocken. Mit den Loop vun de Klock sünd Tahlen inschräben vun 1 bet 8. Twüschen de Tahlen sünd Stierns tau seihn, de Schmuck sünd. Genau tau kennen sünd dormang twei Löcker, de ein mit egen Hännen makt hett. Dat Lock in de Kuhl wier för de Kompassnadel dacht, de up ein lütten Stickel ut Metall seet. Dat anner Lock wier för den Polfaden dacht. Bi dat Upklappen treckt sick de Polfaden twüschen Bodden un Deckel stramm. Disse Faden schmitt, wenn ein de Klock nah den Kompass korrekt utrichten deit un grad höllt, de sülwige Klockentied up beid‘ Klocken – de horizontalen un de vertikalen. Wenn disse Oort Klock noch nich kaputt wier, denn hett sei ok an Deckel un Bodden ‘n Verschluss hatt.

Bi anner Klocken, de wat viegelienscher makt wieren, stünnen noch Listen vun Städte in mit ehren Breidengrad orrer ok noch’n Maandkalenner dorbi.

De Oewerlieferungen vun de Geschicht un vun de Archäologie vun Pasewalk wiesen dat Bild vun ein Hannel- und Handwarksstadt bet 1630. De Satdt hett Innahmen vun denn Hannel mit Kuurn oewer de Ücker hatt. Hier krüüzten sick verschieden Hannelsweeg vun Bramborg un Pommern. Sei harden väle Hannelsvördeile dörch de Hanse un wieren so beten bäter stellt, wat ok disse Daschensünneklock, makt vun Elefantentähn, wiest, de up den Marienkirchhoff vun Pasewalk funnen wüür. Disse Klock, de’n mitnähmen un tausamenklappen kunn, kunn nämlich blot Stadtlüüd tauhüüren, de ‘n beten wat miehr Geld harden, sick sowat düüret köpen tau koenen.

Disse Oort Kompass-Klapp-Sünnenklocken gifft dat vun de Midd vun dat 15. Johrhunnert an in Europa. Bruukt hebben de Lüüd ehr bet tau dat 17. Johrhunnert. Later hebben sei de vun Holt makt un binnen mit Papier utkleid’t. Makt hebben sei de miehrsten in Augsburg un Nürnberg. De Gill vun de Kompasmakers harr ok dat Recht, Klapp-Sünnenklocken tau buugen. Dat kann in de Gillordnung vun de Nürnberger Kompassmaker ut dat Johr 1535 rutläsen.