Waffenrock (Modell 1895) vun den Grotherzog Friedrich Franz IV. as General vun de Kavallerie un Boebelst vun dat Grotherzoglich Mäkelborg‘sch Dragonerregiment Nr. 17, Ludwigslust

• 1895

De Uniformrock is ut fienet, düüret kuurnblaumenblaget Dauk makt. Hei hett ‘n ponceauroden eckigen Kragen un rode schwed‘sche Ärmelupschläg‘. An‘n Kragen up beide Sieden un up jedein Upschlag sünd twei in Gold stickte Gardelitzen. Vörn hett de Rock acht, achtern an de Schmieg vun de Taschen söss gäle Knööp.

Up de linksche Siet up de Bost is ‘ne Schling‘ an, wo ‘ne Spang för Ordens, för Ordensstierns un Anstickkrüüze fastmakt warden kann. Dorünner is‘n Linnenkrüüz (Professkrüüz) vun‘n Johanniterorden för Friedrich Franz IV. as Rechtsriddersmann vun de Prüß‘sche Ballei vun‘n Johanniterorden.

De Mäkelborg‘schen Feldschullerstremels (Modell 1888) sünd vun‘n gollen-sülwern Fläken ut Kantschnur up ponceaurodet Dauk. De sülwern Schnur hett‘n blag-rod-gollen Dwarsstriepen. Up de Schullerstremels sitten sülwern Rangstierns mit Kron (an‘n 18. Juli 1885 inführt) un dat vergoll‘te Monogramm FF III. Dat hett Friedrich Franz IV. so anordent‘, as hei 1901 de Regierung un dat Dragonerregiment oewernahmen hett. Hei wull, dat tau‘n Andenken an sienen Vadder Friedrich Franz tau dat Monogramm ok de Tahl III. up de Schullerstremels dortaukamen süll. Hei dröög sülwst de Uniform ok noch nah den I. Weltkrieg.