Wappentafel

• 1553/1564
• Terrakotta
• vun dat olle Heilig-Geist-Hospital in Burg Stargard
• 62 cm lang

Üm de Tafel, de ut mieh’re Deile is, sünd Piler un Schmuckleisten anbröcht. Kann angahn, dat disse Zierraten all vun fröher stammen daun. De Wappenschiller un dat, wat dorup steiht, enstahn ierst 1564 un wiesen dat Wappen vun Herzog Ulrich den III. vun Mäkelborg un seine Fru, Elisabeth vun Dänemark. Wo dat Terrakotta herkümmt un wegge de Künstler is, de dat makt hett, weit keinein. Bekannt is blot, dat dat ‘ne Warkstäd ut’n Nuurden vun Düütschland is. Baben up de rechtsche Siet is de Stierkopp mit de Kron un ein Halsfell tau seihn (siet 1260). 1509 wüür denn ein Näsenring dortaumalt. Ünnen is ein Arm mit ‘ne Bind‘ un ‘n Ring tau seihn – dat Teiken för de de Herrschaft vun Stargard. Dat hett tau daun mit de Hochtied vun Heinrich den II., den Löwen vun Mäkelborg, un Beatrix vun Brandenburg in dat Johr 1292. Mit disse Hochtied kümmt dat Land Stargard tau Mäkelborg. De Vagel Griep, de upstiegt, is dat Teiken för Rostock, de Stierkopp mit de Kron ahn dat Bostfell steiht för dat Fürstentum Wenden. Dat halwig Schild in de Midd hett mit den Ankoop vun de Grafschaft Schwerin in dat Johr 1366 tau daun.

De rechtsche Deil wiest dat „Grote Dän’sche Wappen“ – baben up de rechtsche Siet drei Löwen mit ‘ne Kron, de liggen, as Teiken för Dänemark un ünnen up de rechtsche Siet drei Kronen as Teiken för Schweden un as Teiken för de Union vun Kalmar, wo sick Dänemark, Norwegen un Schweden tausamenschloten hebben. Baben up de linksche Siet süht‘ ein Löwen mit ‘ne Kron, de upstiegt, mit ‘ne Äxt för Norwegen un ünnen einen Löwen, de oewer nägen Harten liggt. Hei kiekt nah vörn un hett ‘ne Kron up’n Kopp un hei is dat Teiken för den Titel „König vun de Goten“, denn dat vun 1361 an gifft. De Lindworm ünnen vertellt vun den Sieg vun Bischop Absalom oewer de Slawen up de Insel Rügen un den Titel „König vun de Wenden“, den dat vun 1440 an geef. Dat Krüüz steiht för de Provinz Delmenhorst in Ollenborg. Dat Middelschild wiest fief Afdeilungen. As Christian de I. 1460 tau’n Herzog vun de Provinzen Schleswig un Holstein wählt wüür, hebben sei tau dat Wappen vun dat dän’sche Riek as Teiken för Schleswig ein Poor Löwen un för Holstein ein Nettelblatt dortaumalt. Tau de sülwig Tied kümmt de Schwan mit de Kron üm den Hals för de Holstein’sche Provinz Stormarn un twie Balkens för Ollenborg dortau. Dat middelste Feld wiest ein‘ Schaapbuck, de nah vörn kiekt, as teiken för de Faröer-Inseln.