Marie-Hager-Hus
Dat Marie-Hager-Hus is dat Hus in Burg Stargard, in dat de Billermalerin lääft un arbeit’ hett. 1921 is dat Hus na ehre Vörstellungen buucht worn. In dat Hus is binah allens noch original, so as Marie Hager wahnt hett. Hüt warden hier Biller von de nuurddütsche Malerin wiest.
Marie Hager is an denn 20.03.1872 in Penzlin buren. Ehr Vadder wier Paster in Penzlin un Dargun. Hager hett tauierst dat Singen studiert, hett dat œwer nalaten un denn dat Malen studiert. Von 1904 an wier sei Schäulerin von Max Uth. Later harr sei ok Ünnerricht von Eugen Bracht, Hans Licht un Ernst Kolbe. Von 1910 an wier Marie Hager egalwech bi grote Kunstutstellungen dorbi.
Besünners leifte sei de Butenmalerie, ofteins kunn’n ehr mit Staffelei un Malsaken buten begägen un bi de Arbeit taukieken. Sei malte in verschieden technik: Öl, Aquarell, Fedder, Holtschnitt, Kried orrer Bliefedder. Besünners bekannt worn is sei dörch ehre Haben-, Landschafts- un Städt’biller. De mihrsten Biller hüren hüt Privatlüd. An denn 25.04.1947 is Marie Hager storben; ehr Graff is up denn Kirchoff von Burg Stargard.
