Kunst un Buugkunst 1550 bet 1600

Reformatschion un Humanismus führen tau de Renaissance. Bi den Hoff un in gröttere Städten kümmt de Kunst tau‘n Bläuhn. In dat Gewarw vun de Druckerie gifft dat ‘n bannigen Upschwung. Dat Güstrow‘sche Schlott, dat in‘n Oewergang vun de italienisch‘ tau de nedderländ‘sch Renaissance buugt is, ward dörch disse Oort un Wies tau nationale Architektur. Bi de Schlötter vun Gadbusch, Wismar (Fürstenhoff) un ok Bützow un Schwerin kann‘n seihn, dat sei verwandt sünd wägen de Terrakottastein, de dor verbuugt sünd. Statius van Düren, de in Lübeck sitt un vun Holland stammen deit, hett in Schwerin woll ok ‘ne Warkstäd, wo hei de „druckten Stein“ makt.

Bi Hoff un in de grötteren Städte kümmt de Kunst bilütten tau‘n Bläuhen. Dat Drucken kricht ‘n bannigen Upschwung. Philipp I. vun Pommern-Wolgast fangt an alle Ecken an tau buugen. Ok dat Schlott in Wolgast ward nah einen Brand 1557 Stück för Stück as Residenz utbuugt. 1554 gifft hei ok denn Croy-Teppich in Updrach. Dit Kunstwark, dat bannig grot is, wiest all de Lüüd ut de Verwandtschaft vun de Fürstenhüüser vun Pommern un Sassen tausamen mit de Reformatoren Martin Luther, Philipp Melanchton un Johannes Bugenhagen.