Kunst un Buugkunst 1850 bet 1900

In Schwerin, Güstrow, Wismer, Niegenbramborg un Rostock grünnen sick Kunstvereins un so‘ne Vereins, de sick mit de olle Tied befaten, leggen Sammlungen för dat Museum an. 1882 kriggt Schwerin ‘n Museumsgebüügt nah de Plän‘ vun Hermann Willebrand. In Waren ensteiht ‘n Naturkunn‘museum.

Dat Schweriner Theater blifft ‘n Hofftheater. Friedrich von Flotow hett bi dat Konzertläben dat Seggen. Ok in Niegenstrelitz gifft dat ‘n Lannestheather. Börgerlich‘ Stadttheather enstahn in Rostock, Wismer un Güstrow. Tau de Kultur hüüren in de Erhalungstied Feste för Sängerbünd‘, Mäkelborger Musik, Bälle vun verschieden Vereins orrer private börgerlich‘ Geselligkeiten.

De Architektur sett‘ verschieden Buugstile tausamen, sei ward eklektizistisch. Gotthilf Ludwig Möckel makt den Entwurf tau väle wichtige Gebüügt, dormang ok dat Ständehuus in Rostock. Butenmalers grünnen üm 1880 de Künstlerkolonie in Schwaan. Anner mäkelborgsch Maler treckt dat in de Kolonie nah Ahrenshoop.

Wägen de schöne Gägend kamen an‘t Enn vun dat 19. Johrhunnert Malers her. Sei klucken sik in Kolonien tausamen un willen de friee Natur mit de Seen, de Hollen, de See un de Hügels malen. Ahrenshoop up dat Fischland hett de gröttst‘ Bedüdung. Œwer ok de vörpommerschen Inseln warden tau Künstleruurte.

In Vörommern hebben drei prüß‘sche Truppen ehr Lager upschlahn: in Stralsund, in Griepswold, Demmin un Pasewalk. De Armee buugt bet taun Enn vun dat 19. Johrhunnert väl, allens in de verschieden Neostile.

Nah grote Stormflauten finnen sei up de Insel Hiddensee ‘n güllen Schmuck ut 16 Deile. 1873 un 1874 ward de vun dat Museum Stralsund anköfft.