Läbensoort 1650 bet 1700

Dat dat Johr vun den 1. Januar bet tau den 31. Dezember tellt ward, is all ‘ne olle Sak. Dat Läben vun de Minschen richt sick oewer eihrer nah de Johrestieden orrer so’ne Dag as St. Martin (11.11.), wo de Paster ‘ne Martinigaus kreeg, orrer as Antonii (31.1.) un Jehanni (24.6.), wo de Pacht un anner Saken betahlt warden. Ostern un Wiehnachten sünd Kirchenfeste.

Nah denn Westfälischen Frieden 1648 sünd Familien, Kultur un Religion dörch de niegen Grenzen twüschen Schweden un Brandenburg trennt. Up de anner Siet wassen schwed’sche un pommersche Familien ut de böbelste Schicht tausamen. Kompanien vun dat Schwed’sche Militär warden in Anklam, Damm, Demmin, Griepswold, Wolgast un Wollin inquartiert in Börgerhüüser. Dat gifft kein Rauh in’t Land. Ümmer wedder gifft dat Krieg un Kabbeleien mit de Nahwergägenden, wat vör allem de Lüüd, de hier läben, schaden deit.

Dat Handupleggen orrer dat Bepüstern sünd de "Heilmethoden", de jedein kennt. Dat gifft ok Rituale, de gesund maken sallen: taun Bispill bi Vullmaand dörch Löcker mang de Telken vun ein Boom tau krupen. De „Krupeiken“ sünd dorför bi de Lüüd bekannt. Up disse Oort ward ok dat Veih kuriert. Ok Barbiers un Wunddokters heilen de Lüüd, laten sei tau Ader orrer setten Schröppgloes up. 1690 ünnersäuken sei dat Water vun denn Kenzer Born bi Barth un finnen rut, dat dat heilen künn. Dat ward ein Huus üm denn Born buugt. Moderne Medizin vun studierte Dokters sett sick ierst laat dörch.