Landwirtschaft 1750 bet 1800

Vun 1753 an warden friee Hoffstäden mit Bäudnerien (2-9 ha) upsiedelt. Domaniale Buern warden twüschen 1768 un 1778 vun den Hoffdeinst frie. De Wirtschaft up drei Feller mit Weiden dorbi wannelt sick nah dat Holstein‘sch Vörbild tau de mäkelborgsche Schlagwirtschaft mit soeben bet twölf Schläg. Vun 1785 an warden span‘sche Merinoschaap tücht. Üm 1790 rüm geiht dat mit den Anbuug vun Katüffeln los.

1793 gifft dat up de ein Siet 138 ingebuurene Gaudsherren, also de Eddellüüd, de dat Haupt vun de Ridderschaft sünd. Up de anner Siet gifft dat all 117 Eddellüüd, de tautreckt sünd un ok all 111 börgerlich‘ Riddergaudsbesitter. Kuurn, Bodder, Kartüffeln un Fleesch warden nah Frankriek verköfft. Dor harr dat ‘ne leege Aust gäben un ok wägen de Koalitionskriege hebben de hier wat köpen wullt.

1779 fangt dat an, dat de Landwirtschaft in Prüß‘sch-Pommern ümwöltert ward, de Liefeigenschap ward beten lockert un de Grundbesitter kœnen günstig Kredit kriegen.

1790 buugt Joachim Nettelbeck ut Kolberg bi Stargard dat ierste Mal Tüfften as Plant tau‘n Äten an. De Feldbuug mit Tüfften un Klewer bruukt nich miehr soväl Arbeitskraft.

In Schwedsch-Pommern warden dat nah dat Johr 1770 ümmer weniger Buernstäden. Dat kümmt dorvun, dat de Koppelwirtschaft inführt ward un de Buern "leggt" warden. Tau disse Tiet gifft dat blot noch 15% Buerslüüd. Tau‘n Enn vun dat Johrhunnert is de Buernstand binah ganz un gor taunicht. Twei Drüttdeile vun de Landlüüd sünd liefeigen. Binah 40% vun dat Land wad nich bewirtschaft‘.