1952 fangt de SED an tau dremmeln, dat de Buern sick tau Produktschionsgenossenschaften (LPG) tausamenschluten sallen. För de LPG warden denn Maschinen-Traktoren-Statschionen inricht‘. In de Johren dornah geiht dat politisch ümmer hen un her, wat œwer 1960 tau enn‘ is: nu warden all in de LPG dwungen! Denn keem de Idee, dat de Landwirtschaft miehr so organisiert warden süll as ok de Industrie. So warden vun 1967 an „Kooperative Afdeilungen Plantenproduktschion“ (KAP) grünnt. De VIII. Parteidag vun de SED 1971 fœddert denn de „industrielle Grotproduktschion“ tausamen mit de industriellen Mast (KIM). So schluten sick de Betriebe ümmer miehr tausamen, de gröttsten sünd denn de Agrar-Industrie-Vereinigungen (AIV). De AIV Friedland in den Bezirk Niegenbramborg hett 32.460 ha un is de gröttst in de DDR.
De letzt‘ DDR-Volkskamer makt 1990 dat Landwirtschaftsanpassungsgesetz. Dat gifft de Privatlüüd den Bodden trüch un makt, dat de verschiedenen Betriebsformen all egal behannelt warden, ok de Genossenschaften. Tau de Tied hebben 158.000 Lüüd in de Landwirtschaft arbeit‘, 1992 sünd dat man blot noch 36.000. Wat Nieges sünd de „Nieginrichters“, de vun woanners tautrecken un ackerieren orrer Veih hollen. 1991 gifft dat in Mäkelborg-Vorpommern 3.176 Landwirtschaftsbetriebe. Vun dor an ward de Tahl vun de Betriebe ümmer grötter, œwer de Landwirtschaften an sick ümmer lütter.
