Politik 1700 bet 1750

As 1695 de Güstrow‘sche Telk vun de Herzogsfamilie utstarwt, kümmt dat tau‘n Stried üm de Arwschaft. So ward in den „Hamborger Vergliek“ 1701 de drütte Updeilung vun dat Land fastleggt. Ut Stargard un dat Fürstentum Ratz‘borg ensteiht dat Herzogtum Mäkelborg-Strelitz. Mäkelborg-Schwerin kriggt dat werlesche Flach üm Güstrow rüm.

So bi 10% vun‘t Land in de beiden Mäkelborgs hüüren de Städte un de Lannesklöster. 40% behollen de Herzög as Domanium, dat sei an de Gaudspächters tau‘n Bewirtschaften gäben. Wedder 40% deilen sick de 600 Eddellüüd, de ehre 1000 Gäuder up dat Land hebben. 4.900 Buernwirtschaften blieben noch up den Rest.

De Nuurdkrieg (1700–1721) wöltert de Gägend üm un stört allens in Chaos. Schwed‘sch–Pommern ward besett un vun Russen, Prüßen un Sachsen utplünnert. 1713 gifft Zar Peter I. Orrer, Anklam un Wolgast daltaubrennen. De Dänen besetten Rügen. 1720 follen de Habenstädte Stettin, Anklam un Demmin mit Usedom un Wollin för 2 Millionen Rieksdaler vun de Schweden de Prüßen tau. Sei hüüren denn tau de Gägend Prüß’sch-Vörpommern. Vun 1723 an regiert in Stettin de Kriegs- un Domänenkamer as Zentralverwaltung. De Regierung hett blot noch för Justiz, Kirch un de Schaul dat Seggen.