Politik bet 1200

De Slawen läben in dat 8. un 9. Johrhunnert hier mit de Stämm vun de Obodriten in‘n Westen un vun de Wilzen orrer ok Lutizen in‘n Osten. De Middelpunkt vun ehr Läben sünd grote Borgwallanlagen, de oewerall in‘t Land verdeilt sitten as de Knuppen in ein Fischernett. De Lutizen marachen sick af bi‘t Strieden mit Sweert un Äxt un willen dat so utfechten, de Obodriten oewer schluten sick all tiedig üm 1100 tau einen Staat tausamen, de sick vun Ostholstein bet an de Oder reckt. De Mäkelborg is ehre Hauptborg. De Sassenherzog Heinrich de Löw (1129–1195) nimmt dit Obodritenriek 1142 in un grünnt de düütschen Grafschaften Ratz‘borg un Dannenberg.

1154 kriggt hei vun‘n Kaiser dat Recht Bischops in dat Slawenland intausetten. 1164 schmitt hei de letzten Truppen vun de Obodriten dal. Den Slawenfürsten Pribislaw gifft Heinrich ‘n grot Stück vun den sien Vadder-Arwdeil trüch un ünnerstütt‘ so Pribislaw sien Kraasch.

De Slawen sünd in dat 8. un 9. Johrhunnert de Stämm vun de Ranen orrer Rugier up de Insel Rügen un de Pomoranen an de Mitt vun de südlichen Ostseeküst. Tauhoop kamen sei in Burgwallanlagen, de sick oewerall in’t Land verdeilt finnen. Wartislaw de I. grünn’t 1124 dat pommersch‘ Herzogshuus vun de Grieps un makt sick breid bet nah de Peen hen. Herzog Kasimir vun Pommern möt 1164 de Lähnshoheit vun Heinrich denn Löwen anerkennen. Mit sienen Brauder Bogislaw I. halt Kasimir 1178 tau’n iersten Mal ein Landdag up de Borg vun Ueckermünn‘ tausamen. De Slawenfürst Jaromar lett sick 1168 up de Insel Rügen vun den Dänenkönig Waldemar ünnerkriegen. Waldemar is’n stuurköppschen Rivalen in dat Slawenland.