Religion 1500 bet 1550

De Humanist Ulrich vun Hutten geiht up den iersten Padd up de Reformatschion tau. Lüüd, de in Luther sienen Sinn prädigt hebben, wieren Aegidius Faber in Schwerin un Joachim Slüter in Rostock. Slüter is de, de dat ierst‘ plattdüütsche Gesangbauk schräben hett. Sei verkünnigen all de niege Schaul. Slüter kriggt Ünnnerstüttung vun den Syndikus Johann Oldendorp, de 1530 de Rostocker Kirchenordnung reformiert. För de infachen Christenminschen geiht dat oewer dorüm, Heil för ehre Seel tau finnen un den Weg dorhen tau säuken.

1549 ward de Schiedsspruch an de Sagsdörper Brügg bi Stiernbarg spraken: de Protestantismus gellt för Mäkelborg un de Lannesherr is de summus episcopus, de boebelst Kirchenherr, un de Kirch in‘t Land is up em tauschnäden.

De Humanist Ulrich vun Hutten vun de Universität Griepswold tuut in dat Huurn vun de Reformatschion bannig mit rin. In Stolp kümmt dat 1521 tau Tumult. Nah de Predigten vun Johann Amandus in dat Johr 1524 kümmt dat dor tau dat Utplünnern vun kirchlich Hüüser. 1522 ward Johannes Kureke ut Treptow an de Rega rutjagt. Hei is denn de Anführer vun denn "Stralsunner Kirchenstorm".

Bogislaw X. seggt nix gägen evangelisch Predigers, solang sei nich tau Upstänn upwiegeln. Ok siene Soehns Philipp un Barnim führen disse Politik wieder. In denn Sommer 1534 willen sei bi einen Landdag mit Eddellüüd, Kirchenlüüd un de Städten de Reformatschion dörchsetten.

Ofschonst dat nich tau Klappen kümmt, gäben sei Johannes Bugenhagen denn Updrag, dat hei ‘ne niege Kirchenordnung upsetten sall. Dat kümmt denn dortau, dat de Klöster enteigent warden un säkularisiert, also weltlich makt. Fief vun de Klösters warden tau Damenstifts makt. All dat Land kassiert de Herzog in.

De 1. Theologieperfesser an de Universität Griepswold ward de Paster vun Sankt Nikolai, de ok de Generalsuperdent vun Pommern-Wolgast is.