De Slawen läwen tausamen in ehre Familien, de denn wedder tau einen Stamm tauhüüren. De Arbeit deilen se sick un sei glöwen an de Natur un ehre Religion is ok dornah. Üm 1200 rümm’e bringen de Christen denn ehre Vörstellungen mit. Œwer de Naturgloben un de Œwergloben gellen ok dornah noch wat. Up’n Dörp läben de Lüüd updeilt in Buern, de up ehren Hoff wirtschaften, Gaudsherren un de ünnelste Schicht, de Ünnertanen un de Liefeigenen. In de Städt‘ läben Patrizier, Handwarkslüüd un infache Lüüd. Bet tau de Reformatschion in dat Johr 1549 hett de Klerus dat Seggen oewer dat geistige Läben.
Tau wegge Schicht de Minschen sozial tauhüüren, hangt tausamen mit ehre Familie, de Billung, wat du hest un wo du herkümmst. Ierst in dat 20. Johrhunnert warden disse feudalen Indeilungen aflöst vun ein börgerlich‘ Hanneln. De Lüüd räden all tausamen Plattdüütsch. De Sprak för de Ämter un för dat Recht ward vun dat 16. Johrhunnert an Hochdüütsch.
De Lüüd in de DDR seihn de Vördeile dorin, dat jedein Arbeit hett, dat dat sülwe Recht gägen Manns- un Frugenslüüd up’t Papier steiht un dat’n sick sozial afsäkert fäuhlen kann. De Frieheit un de Demokratie keemen nah 1990 un bröchten ‘ne frische politisch‘ Kultur, œwer ok, dat wegg Lüüd blot noch an sick denken orrer sick as Einspänner fäuhlen.
