1250 bet 1300

Dörch den Seehannel kriggt de Hanse bannig Kraasch un de Koopmannschaften warden riek. De Hanse un de Geistlichen verträden moderne europäisch‘ Gedanken. Dat kümmt ok vun den Influss vun de römischen Kirch‘ tau de Tied. Juden, de tautrecken, köpen un hökern un leihnen anner Geld. 1241 schluten Lübeck un Hamborg einen Hannelsbund, tau den bet 1265 Kiel, Wismar, Rostock un Stralsund dortaukamen. So ensteiht dat „wendisch Quartier“ vun de Hanse. Lübeck oewernimmt 1300 dat Leit.

De Kirchen, Stadtduure, Börgerhüüser un Rathüüser bruuken spezialisierte Buuglüüd. An de Grenz tau Bramborg lang warden Borgen ut Backstein buugt. An Feldklöster un Dörpskirchen buugen de Handwarkslüüd johrelang.

1298/ 99 föllt dat Land Stargard dörch Hochtied vun Bramborg an Mäkelborg.

Barnim I. hei schmitt de updeilten Herrschaften in Pommern tausamen. Ut de lokalen Grundherren warden de pommerschen Landeddellüd. De Stänn, de Eddellüüd vun’t Land, de Städten un de Kirchenlüüd schluten sick 1278 tausamen. Sei willen tausamen Landesstüern inkassieren, de oewerall gliek un egal sünd. Dordörch ward dat Herzogtum tausamenhollen.

Grote Stücken warden dalbrennt un rod‘t, üm so Acker un ok Weiden tau hebben. Väl Holt ward bruukt för Schäpen un för de Fackwarkhüüser. De Gägend ward tau disse Tied tau ein Kulturlandschaft.

In dat late Middelöller warden vun de 58 Städten 30 Stück in de Tied vun 1226 bet 1275 grünnt‘. Dat "wend’sche Quartier" vun de Hanse ensteiht un Stralsund ward dordörch tau ‘ne dägte Macht. De Hansestädt‘ hebben Münzrecht, dörben Zoll inkassieren, hebben Flotten un Suldaten.

Dat gifft Kooplüüd, de dat Seggen hebben, tausamen mit de Geistlichen vun den kathol‘schen Klerus. Vun baben nah ünnen verdeilt sick dat so: tauierst kamen de Handwarkslüüd, denn Gesellen un de, de ehre Deinste verköpen daun, un ganz tauletzt de ganz un gor armen Lüüd.

De Klösters billen dat geistig‘ Middelstück för Wätenschaft un Billung in Pommern.

Up de Lehenspyramid‘ stahn de Buern up de ünnelst‘ Stuf. Sei hangen tau de Tiet noch nich tau dull vun de Grundbesitter af.

De Herzog Barnim gifft 1261 de Juden dat glieke Recht wie de annern Inwahners.